Maraming salamat sa alak na nagbigay sa akin ng sapat na lakas ng loob at kawalan ng pagpipigil sa sarili upang ipahayag kung anuman ang nasa saloobin ko.
Maraming salamat sa mga magulang ko na nakinig sa prinispyo ko; na hindi isinawalang-bahala ang sarili kong idealismo.
Maraming salamat sa pag-aakala ko na maaring hindi bigyang halaga ng magulang ko ang mga pinaniwalaan ko sa nakalipas na ilang taon; na sa pagkakataong biniyayaaan ako ng alak ng sapat na tapang para ibahagi sa kanila ang mga prinsipyo ko, hindi sila nag-atubiling magbigay ng suporta sa akin; na nakita ko pa ang tatay kong ngumiti habang ipinapaliwanag ko ang mga bagay na matagal kong pinili na hindi banggitin sa kanila.
Nakakaiyak pala talaga na magkwento ng ilang bahagi ng pag-iisip mo na totoong mahalaga sa'yo. Mas nakakaiyak kung ibinabahagi mo ito sa mga taong mahalaga sa buhay mo.
Muli, maraming salamat sa gabing ito.
No comments:
Post a Comment