Wala, matigas talaga ulo ko eh

As if hindi pa sapat na validation yung ilang taon na pagbubunganga at pagpapagalit ng magulang ko sa akin, ngayon, tinatanggap ko na: matigas nga talaga ang ulo ko. Kaya siguro mas trip ko talaga para sa akin ang mahabang buhok eh. Wala lang, gusto ko lang i-konek 'yon.

Pagkatapos ng ilang interviews na pinuntahan at hindi pinuntahan, dalawang trabaho na tinanggihan at ilang oras na pagtingin sa Jobstreet kung meron bang mapupusuang pag-aapplyan - humantong din ako sa paghihintay ng tawag sa pinakaunang trabahong pinasahan ko ng application form. Mind you, naghihintay pa lang ako ng interview, hindi pa job offer mismo. Unang sabak ko pa lang sa mundo ng paghahanap ng trabaho, nabiktima kagad ako ng inefficiency ng gobyerno. Apat na buwan para sa hiring process, at ang tanging nagawa ko lang ay makakuha ng exam na halos di ko rin naman kayang sagutan.

Sa isip-isip ko kasi, hindi pa sapat na senyales yung hirap ng exam na kinuha ko tiaka yung pagkakaroon ng work experience ng ilan sa mga nakasabay kong mag-apply para matantiya ko kung matatanggap ba ako sa DENR. Sa isip-isip ko, eh baka may laban pa rin naman ang fresh grad na kagaya ko, ibibida ko na lang yung eskwelahan na pinanggalingan ko, pati 'yung extracurriculars ko siguro. Kaya ayun, nasabi lang nung babae galing sa HR ng DENR na iinterview-hin din naman pala lahat ng nag-exam, binitawan ko agad yung job offers na meron ako.

In short, i-binase ko sa hopia ang unang hakbang ko para sa karera ko. So far, kinakaya ko pa naman ang unang pagsubok sa prinsipyo at idealismo ko. Eh sa gusto ko eh.